K.I.O/K.I.A, Myu tsaw Mung tsaw Share Shagan ni hte Wunpawng Sha ni Hpang De.
N-htoi : 1 August 2011
Monday
Shawng nnan Karai Kasang a chye ju hpe shakawn nngai law….
Ya na zawn shanglawt hte myen ni majan byin gap hkat nga ai ten hta ( HPUNG MAGAM GUN LANGAI A “HKRIT HPA SIM SA LAM” ) tsun ai hte maren , ya ten hta Sim Sa lam jahta na ngu ai gaw kaja nan grai hkrit hpa re ngu ngai Wunpawng Moses hku na mung dai hku sha mu mada ai. Hpa majaw nga yang ndai myen ni hpe ngu ai gaw tsep kawp nmai kam ai kaw lawm ai. An hte Wunpawng sha ni gaw grai myit san seng let galaw wa yang shan hte gaw magyi magaw hku hkrai rai wa wa re ai hpe anhte dum ra ai. Ya ten hta anhte a Wunpawng Mung Dan hpe lu hkra nan garan shaw la ra ai aten nan rai sai. Asak hkrung ai Karai Kasang gaw anhte maga de rai nna awng dang na re . Anhte ni Ju ( Iseraela ) ni hpe yu ga, shan hte hpe Narzi ( Germany ) ni Wan Kru jan sat kau ya ai, dai sha n-ga shan hte ni yawng mung , mung dan nlu ai sha shara shagu de hprawng hkawm ra ai prat, lu lu , lu sha na matu manu mana yak ai rai tim shan hte a myit hkrum gahkyin gum din let , gwi gwi rawt tsap nna shan hte Mung Dan hpe shan hte lu la hkra bai gaw gap la mat sai. Kaja wa nga yang shan hte a Mung Dan gaw Wunpawng Mung daram pyi n kaba na re, rai tim ya gaw Mungkan hta Mungdan langai mi rai mat sai. Dai majaw ya na aten hta e tinang Mung Dan tinang gaw gap sa wa saga. Ndai myen ni hpe gaw tsep kawp nmai kam na re. Myen ding man yang n hkyau daram naw magaw ai nga ga malai ma nga ai(ဗမာ ေျဖာင့္တစဥ္ ပမာ).
Dai majaw ya na myen (Thein Sein) woi awn ai hpung ni hku nna ndai zawn sim sa lam jahta mayu ai nga yang gaw tsep kawp njaw na re hpe mu mada ai. Anhte a ahkyak ai Ning Baw ni hpe shan hte maga hku nna gyam shakre wa na hpe ma nmai malap na re ngu shadum mayu ai. Lai wa sai ten Ning baw kaba Maran Brang Seng hpe shan hte maga hku nna shana shat sha saw nna shi sha na shat kaw tsi (အဆိပ္) lagu bang nna gyam sat hkyen ai lam ni mung nga lai wa sai. Tsaw ra hkung ga dik ai K.I.O/K.I.A ning baw ning la ni e.. nang nnga yang nan nmai ai ngu ai hpe ya ten hta nmai malap ai, nang nnga yang ya na W.P mung dan hpe kadai woi awn na ? dai majaw ti nang asak hpe ma grai manu shadan ra nga ga ai. Myen ni hte kanawn mazum ai lam hta grai sadi maja let she rai ra na re.
Yawng a ntsa hta asak hkrung ai Karai Kasang kaw na shaman ya u ga….
Hkung ga let,
W.P Moses
